Konur í eldlínununni (e. Women on the Frontline)
Vandaðir heimildarþættir um hinar ýmsu birtingamyndir ofbeldis gegn konum.
Þættirnir verða á dagskrá RÚV öll mánudagskvöld klukkan 18.30 frá 22.ágúst til 12.september. Einnig verða þættirnir endursýndir á Vod-inu.
Mansal í Nepal
Mansal er þrælahald nútímans sem illa hefur gengið að uppræta. Ólögleg verslun með fólk er þriðja umfangsmesta glæpastarfsemi í heimi á eftir verslun með vopn og fíkniefni.
Mansal í Nepal er afar útbreitt. Landamærin við Indland eru 2400 km löng og því reynist stjórnvöldum afar erfitt að ná utan um vandann. Í þættinum er talað við konur í grasrótarsamtökum sem vinna með yfirvöldum að landamæragæslu. Sérstaða UN Women innan Sþ er einmitt sú að stofnunin leggur ríka áherslu á að vinna með grasrótarsamtökum – því við höfum mikla trú á því að áhrifaríkasta leiðin sé að vinna að svæðisbundnum úrræðum. Fólk sem að býr við vandann er hæfast til þess að uppræta hann. Í þættinum fylgjumst við líka með Sushma sem er 24 ára gömul kona sem ákveður að leita uppi manninn sem blekkti hana í mansal og vændi í Indlandi.
Nauðganir sem kerfisbundið vopn í átökum í Kongó.
Nauðganir eru notaðar til þess að brjóta niður einstaklinga – langoftast konur og börn – þó tölfræðin sýni að karlmönnum sé einnig nauðgað af öðrum karlmönnum. Nauðganir eru afar áhrifarík leið til þess að sundra fjölskyldum og brjóta niður samfélagsheild. Konum sem er nauðgað eru oft einangraðar frá fjölskyldum sínum og börn sem fæðast í kjölfar nauðgana eru yfirleitt ekki velkomin. Í þættinum frá Kongó er einnig sýnt frá konum sem þjást af Fistula – sem er ástand þegar ristillinn leggst inn í leggöngin og konur hafa enga stjórn á hægðum eða þvagi. Þetta er sérlega erfiður sjúkdómur þar sem að hann er ekki einungis gríðarlega sársaukafullur heldur verða konurnar félagslega útskúfaðar. Talað er um nokkrar gerðir Fistula – en þetta gat á milli fæðingarvegsins og þarmanna getur orðið ef konur ganga í gegnum mjög langa og erfiða fæðingu án læknishjálpar. Margar konur í Kongó þjást líka af Fistula eftir að hafa verið ítrekað nauðgað með aðskotahlutum. Í þættinum er talað við eina lækninn sem gerir aðgerðir á konum sem þjást af Fistula en hann gerir að minnsta kosti 600 slíkar á ári.
Heiðursmorð í Tyrklandi
Talið er að meira en 5000 konur og stúlkur séu fórnarlömb heiðursmorða á hverju ári. Þessir glæpir eru framdir í því skyni að verja meintan heiður fjölskyldunnar, einkum karlmanna. Konur hafa verið drepnar fyrir að ganga í fötum sem talin eru óviðeigandi, sækja um skilnað frá ofbeldisfullum eiginmanni, eða fyrir að hafa verið nauðgað. Þrátt fyrir ákvæði í alþjóðlegum sáttmálum skortir í sumum tilvikum samfélagslega vitund um að heiðursmorð séu raunverulega glæpur. Hugarfarsbreyting er skilvirkasta leiðin til þess að koma í veg fyrir heiðursmorð. Hefðir sem kenndar eru við menningu eru ekki lögmál, heldur venjur sem má breyta. UN Women styrkir verkefni sem stuðla að viðhorfsbreytingu: Það er engin sæmd í að drepa. Því viðhorfi verður að breyta.
Aðgengi að réttlæti í Kólombíu
Mannréttindi kvenna eru brotin á hverjum degi um allan heim. Rúmar 600 milljónir kvenna og stúlkna búa í löndum þar sem heimilisofbeldi er ekki álitið glæpur. Í sumum löndum er konum refsað grimmilega fyrir að hafa verið nauðgað eða nauðgari sleppur við refsingu ef hann giftist fórnarlambinu. Um 70 % af þeim sem búa við sárafátækt í heiminum eru konur. Ein ástæða þess er að eigna- og erfðaréttur er víða eingöngu í höndum karlmanna og konum er meinað að eignast lönd eða eignir.
